Sentencia discriminarotia contra tesis doctoral en asturiano

L' Academia de la Llingua afirma que la sentencia del TSXA contra la tésis doctoral n’asturianu ye "discriminatoria"

01/02/2007 L'Academia de la LLingua Asturiana dio ayeri una rueda de prensa escepcional pa dar la so valoración sobre la sentencia del Tribunal Superior de Xusticia d'Asturies sobre'l casu de la tésis doctoral n'asturianu. L'ALLA alcuentra "discriminatoria" y "alloñada" de la Llei d'Usu del Asturianu la sentencia del TSXA contraria a la tramitación de la tesis doctoral "El discursu de la periferia: proyectos autonomistes n'Asturies contemporánea (1808-1983)" del estudiante de la facultá d'Historia, Faustino Zapico Alvarez, por tar fecha n'asturianu.

Pa l'Academia. que tuvo representada pola so presidenta Ana Cano y los académicos Roberto González Quevedo y Miguel Ramos Corrada, ye "lamentable" que la Universidá d'Uviéu refugue la tramitación de la tesis d'ún de los sos doctores porque'l títulu y resumen de la mesma, dos pasos trámites obligatorios pa la so presentación, tean n'asturianu. La presidenta de l'Academia calificó de "sangrante" la sentencia, sobremanera teniendo en cuenta que "hai precedentes de tesis doctorales feches, defendíes y publicaes n'asturianu", y porque l'autor de la tesis "pudo redactar y defender n'asturianu'l Trabayu d'Investigación del Doctoráu".

Cano ve contradictorio que la Universidá refugue la tésis n'asturianu cuando esta mesma institución "tien los sos estatutos asoleyaos n'asturianu y castellanu por mandatu del claustru" y cuando la mesma Universidá "tramitare formalmente nel so día la petición al Ministeriu de la creación d'una titulación de Filoloxía Asturiana y cuando ye la institución encargada de capacitar al profesoráu d'Educación Primaria y Secundaria pa impartir l'asignatura de Lllingua y Lliteratura Asturianes". La presidenta de l'ALLA apeló a dellos puntos de los estatutos universitarios qu'espeyen el compromisu de la entidá cola lingua y cultura asturianes y a un corpus xurídicu nel qu'entren la mesma Constitución Española, l'Estatutu d'Autonomía, la Llei de Procedimientu Alministrativu y la Llei d'Usu del Asturianu, que, al so entender, defenden el derechu de Faustino Zapico a presentar la tésis n'asturianu. .

http://www.asturies.com/noticia.php?cod=27155