Eth sindic d’Aran encoratge as regions entà auançar ena constitucion dera Acadèmia der Occitan

Eth sindic Francés Boya a assistit entath Conselh Plenari dera Lengua d’Òc deth Conselh Regionau d’Aquitània en Bordèu, a on a presentat eth projècte entara constitucion dera naua Acadèmia dera Lengua Occitana. Pendent era session, s’a arribat ar acòrd entà qu’a finaus d’an se formalize era associacion fondadora que determine era estructura e es foncions deth nau ens. Acompanhat dera cap de Cultura e Politica Lingüistica, Maria Vergés, eth Sindic a soslinhat “era importància” der organisme entara “superviuença dera lengua” e a emplaçat as regions occitanes entà “caminar amassa” en impuls dera naua autoritat de regulacion dera lengua occitana, en tot respectar era unitat e era diuersitat dera madeisha.

Totun, era prepausa se produsís dempús qu’era maxima institucion aranesa e er Institut d’Estudis Occitans (IEO) lancèssen en mes de mai era iniciativa entà crear era acadèmia, en ua prumèra amassada en Aran, que compdèc damb era concertacion dera Euroregion de Pirenèus-Mediterranèa e des conselhs regionaus der Estat francés a on se parle occitan, era Region deth Piemont en Itàlia, es universitats qu’impartissen occitan e era Generalitat de Catalonha.

(Fòto: Francés Boya damb eth president deth Conselh Regionau d’Aquitània, Alain Rousset)