O Concello de Teruel elimina o concurso de villancicos

[alazet]

Qualsiquier desincusa ye buena ta enrestir contr’a religion catolica, ye decir, contr’a identidat e a eséncia d’a nuestra gent.
O equipo de guvierno d’o Concello de Teruel, formato per lo PAR e o PSOE, ha decidito d’eliminar o concurso de villancicos que dica agora se feva a ixa ciudat e sustituyir-lo per una “jornada lúdica multicultural”. Con o refirme d’a CHA e IU e a unica oposicion d’o PP.
Seguntes a concellera d’Educacion d’o Concello “la Navidad también es un momento de convivencia, de respeto, de multiculturalidad". Ixe “respeto” no le ha feito ascuitar as queixas d’os muitos colégios que dica agora participavan n’a iniciativa. Se conoix que cal respetar a os atros, no pas a la mayoria d’a sociedat terolana.
Cal recordar que o villancico apareix en o sieglo XIII, e s’esparde per Espanya en os sieglos XIV e XV e per Hispanoamerica en o XVI. Cal recordar que se claman asinas, villancicos, perque cantavan e contavan as histórias d’as villas, ye decir as histórias d’a gent popular, e que per ixo a gent d’o pueblo les fuen dando un sentito per cada dia més religioso, d’alcuerdo con as suyas creyéncias e sentimientos.
Ixe vinclo entre a cultura popular e a religion, present en totas as manifestacions d'o nuestro património, ye o que fa miedo e fástio a estos carnuços que nos mal guviernan.
Ixos mesmos que promueven, con os nuestros diners, costumbres allenas de tot a la nuestra realidat, quieren de vez fer disaparixer as nuestras radices. Quan ya no recordemos quí somos, o suyo plan s’havrá cumplito.